قصائد قصيره53 *** بقلم السيدابوطاحون
*********
(يا مصر انت جنه
ربيعك فتنا )
وكل فصولك
هواها دوا لنا
وكل اللي باعك
وخانك وخنا
في صندوق زباله
اذا الشعب غنى
*********
لما تغني الديابه
ماتخوفوش العيال
لكل ظالم نهايه
ولكل حال احتمال
*********
إبني القصور وريشها
والفقرا يتهنوا ب خيشها
ياحسره على اكل الفقرا
خبيزه من تحت الشجرا
وبيشتكوك لابن الزهرا
على إساس انت غاششها
*********
كل العيال في بلدنا
بنت و ولد ابطال
بتشربوهم ليه
الخوف من الاندال
*********
يا بحر مليان حيتان
هديت شطوط الامان
مالك .. بتولد نيران ؟
سقطنا في الامتحان !
*********
ديما صباحك صباح
ياخد القلوب للبراح
يبدر بذور الزهور
رافع لواء السماح
*********
لما الطيبه
تبقى في نظر الناس الخيبه
تبقى مصيبه
وتبقى عقولنا بقت محجوبه
يمر الشر المر علينا
بدون ما نحس بأي غرابه
حسره علينا !!!
*********
اتطمنوا
البحر مليان بالسمك
ومالك الملك .. الملك
فاتح بيبان فضله
لكل من خلق
اللي هلك
واللي ف طريق الله سلك
اتطمنوا
وماتخافوش
الظلم
ما تحميه جيوش
*********
زعلان منك
زعلان جدا بس بحبك
قلت اخاصمك .. وأبعد عنك.
لكن قلبي
دايما يهرب مني لحضنك
*********
#قصائدقصيره53
#السيدابوطاحون
#الأخنوم
Keine Kommentare:
Kommentar veröffentlichen